南瓜紅蘿蔔粉葛湯

今日要返工，冇乜特別野要做，等到收工，我搭車去大埔墟寶湖花園街市，去做乜？買花嘛，今日想插花，不過未諗到買咩花。去到我見到好多好靚既蘭花，不過我想買一支支既花用花樽插呀。我睇左幾檔花檔既花，終於決定買紅玫瑰丶百合和少少襯花，好開心，買完搭車返屋企煲湯。

今日煲南瓜紅蘿蔔粉葛湯，材料好簡單，紅蘿蔔1條丶粟米1條丶南瓜約500克丶粉葛500克丶赤小豆1兩丶豬展約600克，將所有材料洗乾淨丶切件，放入煲，加水煲滾後轉慢火煲2小時，落少少鹽調味就攪掂。南瓜紅蘿蔔營養豐富，粉葛赤小豆好岩今日咁熱既天氣飲，成個湯好甜，一家大細都岩飲。