荃灣大戶屋日本菜

今晚早d去荃灣荃新天地一期食大戶屋，去到都要等位，帶位果位女士幾有禮貌。但係樓面的侍應就相對差左。

吉到豬扒好脆好食，好大件又厚肉。面豉湯和d伴菜都ok。

燒魚⋯好大條，中間有一條大骨，所以食果時都唔洗擔心多骨，魚燒到外有少少脆內仍然軟滑，好正！一定要試。

燒腩肉的肉嫰有肉汁，皮超脆，正！必食！

這裡的蒸蛋做得也很好。

尖沙咀海防道熟食市場內的文記

之前一直聽朋友話海防道熟食市場內有好間食店d野又平又抵食，於是就今日走去試下。

今日其實天氣好熱，去這裡真係冇冷氣都幾甘。

我見到餐牌和招紙上寫住有快餐丶午餐丶常餐，仲有好多炒粉面飯。

我揀了常餐($33),A+B+C，吉列魚柳丶沙爹牛通粉丶熱奶茶。

吉列魚柳好大塊，又熱又夠脆，真係有水準！

沙爹牛通粉大碗，而且有好多片牛肉，牛肉不會好鞋或者多根，沙爹味反而唔夠，通粉煮得比較淋左d咯！

熱奶茶可以好肯定話正，夠熱，有茶味又有奶味，完全係大排檔的奶茶味！

新蒲崗瑞士咖啡室- 好味營養餐

新蒲崗是一個工廠區，平民化的茶室丶小食店丶麵店丶茶餐廳丶食堂頗多，不過太多數外觀都較舊式和坐得迫一點。

我在大有街一帶尋找一間比較坐得舒適的茶餐廳，我見到這間瑞士咖啡室。這店裝修比較光猛，坐位唔算太迫，侍應一見到我就即刻前來帶位。

今日來試下個營養餐，因為我想食通粉。這餐有茄腿通丶蛋沙律丶單拼治丶鮮奶/朱古力鮮奶。

因為冇哂鮮奶及朱古力奶，所以轉了熱啡，這裡的咖啡是即磨的，即咖啡機做出來的咖啡是有細滑的泡沫，味香，喜歡飲咖啡的人應該會讚，如果有啡糖會更好。

烚蛋沙律的沙律是雜菜加雜果，雜果是罐頭那種，沙律醬酸中帶甜，食落味道很好。

單拼治我揀了呑拿魚，這裡的吞拿魚醬也是撈沙律那個沙律醬吧，所以味道很清新開胃，麵包是厚切，但可能麵包放得久了表面有點乾。

通粉一望就見到鋪滿茄蓉，再看茄蓉下有火腿絲，然後是通粉。通粉大小適中，沒有煮得太淋，茄蓉冇咩蕃茄味，不過湯係有少許蕃茄味但不強烈濃郁，有加點楜椒粉先帶出味道。扣少許分吧！

這裡侍應都好有禮貌，枱抹得乾淨，算是一間企理的茶餐廳。

環境好但好一般的意菜

放假突然想食pizza，又唔想去Mikki商場因為一田感謝日果度應該好多人，唔想同人迫。

我記得青衣城有一間叫PizzaStage的店，門面好似幾好，於是就出發。

去到唔洗等位，侍應話今日廚師推介是德國豬手，我就睇睇餐牌，最後揀了2人餐$298+10%。

餐湯可以加$13加酥皮，不過酥皮已經賣哂，所以我就揀了意大利菜湯，好濃的蕃茄湯，內𥚃有好多椰菜，個湯可以用杰來形容，湯不太咸，好味。

砵酒牛筋條濶條面，配了一些沙律菜做伴碟，賣相好。沙律菜冇醬汁所以我撈埋落d濶條面一齊食，濶條面撈果時比較難撈好似痴實一堆咁，我夾了少少食，面條好硬，好似未煮夠，面條本身都夠熱，室溫咯，醬汁撈了面條都係覺得硬，醬汁味道幾好，牛筋條炆得好淋但唔入味，好鞋仲痴牙，配合硬的面條，可以一句唔合格。

Meat lover 脆薄pizza，賣相都吸引，批底好脆好好食，餡料的芝士都好味，有青椒絲丶洋蔥絲⋯唯一唔得係d肉腸片有少許雪味，如果肉腸片冇雪味的話，咁就真係好食。

最後是illy熱咖啡，嗅到咖啡香，咖啡表面有細滑的泡，試一啖，好香呀～～正！

下次如果再來，我只會點pizza和咖啡！

大埔橫街中的小cafe店

今日中午收工向大埔墟，唔想食通粉又唔想食咖哩，就周圍行下行下，見到這間小店，我見到都好多人，我估應該食物唔會差吧。

我坐低望下四周的人食緊下午茶餐，我就睇下有乜揀。下午茶餐都好多選擇，有一般的面餐，不過我見好多人叫吉列豬扒丶魚柳丶薯角丶薯條丶沙律⋯牛角包好靚仔的牛角包，我就揀魚柳牛角包配沙律，等呀等呀，wooo，好香的牛油味，好大個包，一切落去feel到個包好鬆脆，魚柳熱到出煙，一啖放入口，連埋d蔬菜一齊食，好爽又脆口，魚柳外皮脆口而內𥚃的肉質好軟滑，沙律醬不多不少剛剛好，估唔到一間小店有咁好食的牛角包！

雜果沙律係鮮果而不是罐頭雜果，小店真係有誠意。

我跟餐的飲品我點了咖啡，因為係即磨咖啡，wooo，咖啡都係做得不錯！

下次要試下吉列豬扒配薯角。