優質點心小店

今日睡醒都已經是中午12點，又想飲茶又唔想去果d連鎖式酒樓，不如就去金鳯軒。這間點心小店之前都有去過好幾次，不過早排好忙所以已經好多個月冇去，唔知這店的點心係米依舊好味。

今日去到見到都幾多人，好彩有2個位，正！見到佢多左d蒸魚午餐配例湯/糖水/凍飲。

我點左蝦餃丶燒賣丶山竹牛肉丶串串咸水角丶蒸黃立倉配例湯。

點心水準依然好出色，蝦餃好大粒，餡料有芹菜粒，很爽囗！

咸水角即炸，不用多説，正，而且看色水，炸野用的油不是那種用完再用的隔夜油。

山竹牛肉的牛肉冇渣丶很滑，墊底的腐皮應該是用上等鮮貨色，因為一入口就溶，腐皮比較少，如果可以多一點更好。

燒賣都係大大粒，很滑，沒有雪豬肉味。

今日最值得讚是第一次向度點的蒸魚餐！先講例湯，西洋菜湯，一啖就飲到陳皮味，很少食店會用比較靚的陳皮煲湯，而且這不是滾湯而是老火湯，見到大大片陳皮丶西洋菜，味調得剛好不太咸，應該冇味精因為不覺太口乾。

蒸黃立倉好大條丶肉厚，用上鮮蒜蓉加豆豉蒸，很細心地放上3條紅椒絲做裝飾，魚沒有泥味，肉滑，蒸的時間掌握得很好所以肉滑，拌豉汁蒜蓉食，正，比很多酒樓煮很出色。

飯是蒸的砵仔飯，蒸飯比電飯煲煮出來的飯好食，店仔相當細心，因為食蒸魚的人一定喜歡魚汁撈飯，飯煮得好更加是絕配！

從食物已經感覺到這店的老闆對食客很細心，現場見到老闆也親力親為在店內忙著招呼食客至傳菜落單。

簡單三文治晚餐

今晚好簡單整份黑椒火腿茄治當dinner

生日飯

好開心同龍太龍少爺一齊食飯同埋佢地同我celebrate我生日，多謝多謝！

見到這個cake已經覺得非常吸引，外層包住朱古力漿灑了金粉，蛋糕上面放上大大片的黑朱古力塊和黑朱古力造的圓筒型裝飾，都有灑上金粉，蛋糕底邊有一些小小圓朱古力脆粒，整個造型已經叫朱古力愛好者為之心動！

切開內層是厚厚的朱古力慕絲，朱古力慕絲厚而濃密又夠滑，不會是忌廉那種太軟身的質地。底部是朱古力蛋糕。吃起來時非常有口感，而且那些小脆粒在軟滑之中也給你好有趣的感覺，整個蛋糕能與酒店級蛋糕相比。

今晚我地去了囍慶酒樓，woooo，大魚大肉的晚飯！犀利，我地叫左東星丶素鵝丶脆豆腐丶海哲丶海蝦煲丶薑蔥蠔煲丶冬瓜上素燴丶紅豆沙，真係超豐富！條魚我掛住食唔記得左影相，哈哈，魚肉鮮嫩又滑，素鵝丶脆豆腐我至愛，海哲比較一般。海蝦煲有粉絲底，粉絲吸哂海蝦味，正！

薑蔥蠔煲係用筒蠔，好肥好大，熱騰騰啫啫聲，好香好野味，蠔又多汁不會煮過頭。

冬瓜上素燴值得一讚，好清甜，中間的素料有栗子丶粟米粒丶冬菇丶蓮子，炒得好香脆，淋上芡汁，非常美味。

紅豆沙有好多紅豆，不會只有糖水，甜度也剛好。

整餐飯真美味。

億世通$179榨汁機用後感

琴晚試左億世通個榨汁機，用了3個蘋果，部機係榨到汁，不過肯定係一件設計不好的產品，因為榨汁之後的蘋果渣仲係好濕，如果一部靚的榨汁機，啲果渣係可以做到好乾的。

因為果渣好濕，代表仲有好多果汁分離唔到，即是浪費左啲果汁同時要用多左生果去榨先榨到一杯。另外係果渣太濕，根本好難跌落個果渣杯，啲果渣係黏住向個蓋度，咁清潔方面比較麻煩。

不過，$179咁平，都可以接受這個質素。

花園餐廳午餐麻麻地！

今日同朋友去左觀塘花園餐廳食lunch，我地叫左一A一B，我揀左美國煙肉雞扒配茨菜丶羅宋湯丶凍啡。

餐包都叫做軟，牛油唔會硬實實，羅宋湯都幾多菜，味道唔會好稀，一般港式西餐feel。

美國煙肉雞扒原來是配了港式西汁，所謂港式西汁就係蕃茄汁加上其他調味料加水加少少芡煮出來的sauce。煙肉有煎過，雞扒好大塊，有手掌咁大，唔算煎到好乾，不過係唔熱，同埋加埋個西汁食落好咸=.=伴碟的炸薯條丶粟米粒同埋小棠菜幾好食。

凍啡真係好淡又少奶=.=

整個lunch可以話係好有舊港式西餐feel，唔可以話啲食物水準差，只能話未必切合這個年代。侍應方面大至上都ok，只係零零捨捨負責我坐果區的侍應小姐好似唔想做咁，板起塊面仲下下比錯食物=.=!

美味經濟素食-大埔多利民

今晚想食得健康清淡啲，就選擇去多利民食素。

向牆上面寫住好多客飯，客飯亦可以當淨餸叫，而且有大size小size比客人揀。另外，佢地都有一個小菜餐牌同埋一個飲品麵小食的餐牌。

我今晚點左羅漢齋飯丶腐乳炒通菜丶一個唔記得乜名的豆腐餸。

一坐低就送上2碗例湯，湯料我見到有合掌瓜丶紅蘿蔔丶花生丶紅豆丶蜜棗丶同埋一些豆，碗湯清得黎好甜，好好味。

先來羅漢齋丶白飯，羅漢齋味道都好清，略嫌茨汁比較多，材料都相當豐富，而且都幾大碟。白飯夠熱，中國人食飯最注意就係碗飯一定要夠熱。

腐乳炒通菜係好大碟，仲要炒得好味，而且係少油之作，好有屋企菜feel。

登登登，唔食乜名的豆腐餸黎喇！軟豆腐切片蒸，淋上素鮑汁，中間果啲粒粒有冬菇丶雜菜丶素肉丶西芹一齊炒番，好野味，拌清淡的豆腐同吃，真係極之夾，賣相一流！

簡單的素菜，可以係好食兼好睇！

大埔好味瑞士卷

有成日去大埔或者住向大埔的朋友，都應該知道有間叫煒成的麵包店，佢地分店多到淨係大埔區都好似有5間！

我好喜歡食佢地既瑞士卷，味道多，有咖啡丶朱古力丶橙丶檸檬丶中央雜錦蛋糕果種同埋原味。蛋糕質地好軟綿綿，多忌廉，真係越食越想食!

元肉靈芝茶

夏天特別易口渴丶疲倦，經常飲凍飲丶汽水飲得太多，變相即是飲高糖份糖水，多飲無益。

今日見得閒，不如煲個健康茶，此茶可以當保健茶飲用。

材料：靈芝1兩丶元肉20粒

做法非常簡單，將材料洗淨，放入煲，加入水大火煮滾，之後轉細火煲45分鐘，熄火搞掂，此茶可熱飲，或待涼入樽放入雪櫃凍飲用。

第一城食上海晚飯

成個第一城就只有一間上海餐館，見店面都好似企企理理，就入去試下喇。

餐牌上面都有好多選擇，而且有套餐。我點了2人餐：1湯3小菜2白飯，有約十幾款小菜供選擇，我當然選了上海排骨丶麻婆豆腐丶味菜牛柳絲。

例湯係青紅蘿蔔湯，飲落冇口乾，應該少味精，至於味道方面，當然冇自己煲的咁好，但比一般茶餐廳的好好多。

上海排骨有2大塊，係大塊，仲要炸得香脆而不太油和乾，有五香南乳的味，正，不過都幾熱氣！哈哈！

麻婆豆腐真係好好食，豆腐滑有豆味，肉碎丶炸菜粒丶冬菇粒都好好味，辣味適中，非常適合撈飯。

味菜牛柳絲都好好食，不過同前2者相比，就較遜色。

白飯煮得唔錯，如果喜歡食菜飯，可以加錢轉菜飯，不過如果撈麻婆豆腐就咁白飯已經好夠。

大埔萬利餐廳經濟扒餐

今晚去左大埔萬利餐廳，晚市飯餐都有差不多十款選擇，另外仲有一本鐵板扒餐的餐牌。

我今次選了茄汁炸蝦雞扒飯配凍啡($42)，另外叫了大大牛骨扒鐵板餐丶忌廉湯丶餐包配紅豆冰($114)。

點餐前我已經問過係米鮮茄，侍應話係，不過一見到碟飯就知唔係鮮茄，蕃茄都冇一片，不過茄汁都唔太差。炸蝦好脆好食，雞扒煎得好香且調味都好，值得一讚係個飯，飯煮得好而米有一點飯香，令我胃口大增。飯餐加$4可以飲凍啡，是細杯，味道很香濃。

大大件牛骨扒鐵板配有薯角丶西蘭花丶雜菜和蒜蓉汁，牛骨扒真係好大件，仲要係2件，正又好味，薯角沾了蒜蓉汁好好食。忌廉湯一般，餐包好熱辣辣，配湯一齊食係絕配！

紅豆冰的紅豆好大粒，豆冰不會過甜，夠凍，正！

以這個價錢，唔可以話好平，但是可以叫做經濟。

新式數碼偵速快相機

要留意

第一城日牛涮涮鍋的美味lunch

第一次來這店，朋友介紹，蔬菜新鮮又多選擇，乳酪雪糕仲要係必食。

侍應帶位後，我地揀左昆布清湯丶日牛set($98),汽水任飲，我出去揀菜，有生菜丶金菇丶鮮冬菇丶蘿蔔丶韮菜丶粟米丶芽菜丶芋絲丶菠菜...炸魚角丶芝士腸丶魚餅丶魚腐丶魚蛋...蕎麥面丶米粉丶烏冬丶米絲丶即食面同白飯任裝！

日牛同豬肉我地都覺得唔錯，肉新鮮，不停添都冇話慢。

乳酪雪糕真係好好食，果啲朱古力粒同豆豆粒同3款醬(士多啤梨丶朱古力丶嶣糖)都好好食，而且原本好飽，食左少少酸的乳酪雪糕之後好似冇咁飽。

洋蔥炒蛋鏍絲粉

洋蔥2個丶切條。
鏍絲粉烚15分鐘左右，不需加油丶䀋。
烚好的粉用凍水沖，咁會爽啲。
開中火，下油丶糖，然後落1/3洋蔥，炒至軟身，再下鏍絲粉丶豉油和老抽，炒至少許乾身再落1/2洋蔥同炒至洋蔥剛軟身，上碟。
開中火，下油丶糖丶雞粉，下餘下的洋蔥略炒，下已打發的蛋炒至熟，放上鏍絲粉上即成。

有heart的街坊點心

因為隔離金鳯實在太多人等位，我就在門外𥄫下這間新開的點心店，我見到有一枱客人食緊蛋散，看見色澤好新鮮，於是提議不如去這店食，這裡有煲仔飯，可以做我的晚餐。

我點了沙律蝦角丶魚翅魚肚雞(唔記得叫乜名)丶蛋散丶鮑魚汁鮮竹卷丶高湯菜心丶鴛鴦腸臘味煲仔飯丶臘腸排骨煲仔飯。

沙律蝦角上面超多鮮果沙律下面托住鮮蝦炸雲吞，奇脆無比。

魚翅魚肚雞有啲似綿花雞上面加了魚翅，魚肚好入味。

鮑魚汁煎鮮竹卷，因為係有煎過，就算淋左鮑魚汁都食到脆皮，証明係即煮。

蛋散，好明顯係好新鮮，鬆脆冇油益味，上面灑上芝麻糖和糖漿，好正，一定要試。

高湯菜心，這個是整晚做得差的一碟，本身高湯同菜心都冇問題，菜心係嫰，不過就係煮得太淋不爽，賣相比較深色。

兩個煲仔飯煮得非常好，臘腸係全瘦又不硬又不太咸，飯香吸哂臘腸臘肉的汁，就更加好食，排骨肉嫩，飯粒分明而且做到有脆飯焦，豉油不會過咸，完全值得一讚！

老闆不時詢問我地對食品有冇評價，而且很細心加茶。食店乾淨企理，廁所亦好乾淨，值得讚。

Pacific coffee的下午茶

今日試一下去Pacific Coffee嘆下午茶，我點了熱Mocha和焦糖芝士蛋糕，mocha香滑，有朱古力味又有coffee味，芝士蛋糕質地好實好rich，焦糖蛋糕layer好香好甜，同芝士好夾，蛋糕面的cream都好香滑。

下次要試下其他蛋糕。